title icon 蠻皮家族
menu_top_background
:::
客語詩歌
:::

南庄山肚.四季印象

◎邱一帆

春天

你歡喜著出紅紅个新

行在來去南庄个路唇

迎接新年

抑係

遊覽人客

一九四五已經離開

二零零五就愛行來

無人還想過問

你染過个歷史

昨晡日

一屋家人个團圓

有一屋家个鬧熱

今晡日

濛紗煙肚个櫻花

就像雲中个仙女

靚靚

有影無影

滿足目珠最實在个想望

 

 

熱天

有一條河壩

清清涼涼

流入童年个心肝肚

石頭頂

水流邊

清潭肚

有影也有跡

 

有一條河壩

流入砂石工廠

流入餐廳民宿

流出鬧熱繁華

蝦公毛蟹無空囥

齊口石斑泅無路

鱸鰻團魚尋無潭

童年

遠看娘花

毋使去河壩

 

 

秋天

山肚有寶

山下有路

木材行啊過

石炭行啊過

有街路

有出路

 

山肚無寶

山下無路

後生人出外尋頭路

年輕人出外尋出路

行毋贏个老人家

渡等吂會走个細人仔

同老屋老狗

做伴

 

山肚有寶

山下有路

觀光產業有前途

頭南公路大嬤條

駛車愛用飛个後生人

敢有閒情

留下來中秋

看月華

賞涼風

聽秋葉

 

 

寒天

種一箱艾菜

掖幾粒香菜仁

在阿伯姆个菜園肚

煮一鑊粄圓

放一桌碗筷

在老屋家个食飯桌

 

老人家頭望望仔

細人仔目金金仔

老黃狗眼剝剝仔

 

這時節个天時

清冷清冷

還係電視肚个年節

鬧熱燒暖

2005/2/6

 

後記:本詩印象式的描寫南庄四季。南庄發展觀光產業,一片熱鬧繁榮的景象,背後,在作者的眼裡,似乎存在著親人與親之間,因距離而生的冷漠,以及人與自然之間的疏離。也反映作者對於南庄的某種深沉的想望。

 

 

 

 

 

 

韭菜花

◎邱一帆

存在  係為著某種想望

禾鐮越割越生

係你解釋介生命

花枝  餃子  雞鴨腸

胗肝  豬紅  大腸頭

無你無味敘

 

存在  係為著某種價值

白花越開越鬧

係你本旦介彩色

親家  且姆

隔壁  鄰舍

大人  細子

隨口唸起韭菜花

無你講無話  

 

 

 

 

香花

◎邱一帆

兩三蕊介香花

一串一串

串起一目一目介風景

馬路項恁多介玉蘭

佇來來去去介車陣底肚

láu烏烏介油煙共下

生活

 

神桌頂介香花

一盤一盤

兜出最虔誠介奉獻

滿堂焗人介花香

毋知憨憨坐介神明

鼻得贏

抑係

鼻毋贏

2004/9/15

 

 

 

 

 

桂花

◎邱一帆

一皮花葉

翻到轉來

就係一條童年船仔

行向頭擺圳溝

石頭結駁空肚

有廿廿趖蝦公毛蟹

軟軟濫泥底肚

有囥人尋蜆仔湖鰍

藤等水流行船大肚魚

尋得著自由生活所在

 

一蕊桂花

鼻出庄下味敘

佇月光華華暗晡頭

夢想該頭擺

長腳凳

圓凳頭

矮凳仔

圍圍秋个故事

樣般

流傳到目前

 

 

 

 

枸薑花

◎邱一帆

隨身个刀嬤

出門做事

斬幾條枸薑

捶出頭擺个薑索

綁樵紮杈

kai轉艱耐个生活

 

den den个山頂

有陣陣个花香

長長个山路

有啾啾个鳥聲

 

順路

摘幾皮薑葉

包等客家山林个味緒

好好來鼻

一生人

2005/1/6修改

 

 

 

 

蓮蕉花

◎邱一帆

蓮蕉花  蓮蕉子

蓮蕉花開想討親

蓮蕉結子望有情

 

屋唇空跡

葉像芎蕉个身影

有庄下老人家个目光

一日一日

望毋得開花

 

街路个轉角

心神無定个魂影

係庄下後生人个運命

一年一年

望毋得春光

 

蓮蕉花  蓮蕉子

蓮蕉花開好姻緣

連招子來望良賢

2004/12/23

 

 

 

 

 

 

蝦公夾花(之一)

◎邱一帆

佇奈位來

海洋

四面八方

行入來

 

到奈位去

海島

四面八方

行出去

 

佇海唇

佇田洋

佇山肚

開花結子

 

佇頭擺

佇這下

佇未來

落泥生根

              

蝦公夾花(之二)

◎邱一帆

摘一蕊蝦公夾

做成細人仔飛行機

追尋

童年腳跡--

田唇路

河壩唇

山林肚

娘花割著跳上跌落手腳

蝦公花草揉出靈妙草藥

 

摘一盤蝦公葉

炒出鮮鮮嫩嫩味道

愐起

艱苦歲月--

番薯籤

鹽膚木

豬油粕

點點汗水化做生命泥肥

一生人

望想愛做

一蕊一蕊蝦公花白

     2005/4/29

 

 

 

 

寫分七層塔

◎邱一帆

你慣勢生在菜園壁角

青青个葉仔

嫩嫩个心

摘一皮揉一下

就走出滿桌个味敘

煲鴨肉

炒蜆仔

煮菜瓜

煎魚仔

無你毋成菜

原汁底肚流出原味

透長年

守顧知味个喙空

在飲食个國度

你係主角毋係配角

雖然你慣勢

企在無人注意个所在

就像細細个海島頂高

一群硬頸个人

堅持行自家个路

永久

你个位跡

無人有法度來代理

就算行到生命个終點

你還係會維持自家个味敘

人間个清白

2005/2/25

 

 

 

油桐花下个思念

◎邱一帆

 

相逢

佇油桐花下

你拈起

一蕊一蕊个雪白

ngai鼻出

滿鼻公个清香

 

相會

佇油桐樹下

ngai拈起

一蕊一蕊个桐子

你愐起

滿樹林个童年

 

童年个腳步

離開了山林

山林

留下en-li

滿地泥个腳跡

 

童年个腳步

離開了山林

山林

留分en-li

一生人个思念

 

後記:童年,山林是生活的體驗營,也是自然的遊樂場。伴隨童年成長的桐花山林,是客鄉子弟童年最自然的自然探索,也是最美麗的回憶。

 

 

 

 

野薑花

◎邱一帆

野生像薑嬤个身影

白花雪雪

跍身山窩山壢肚

一生人

用雪白添�菑s林

有人摘幾枝仔

擺上阿公婆个桌頂高

鼻香

有人採幾頭仔

做出盡風味个客家粽

流傳

ngai想摘幾蕊仔

放入自家个香包底肚

鼻日

鼻夜

2005/1/6

 

 

 

 

 

 

 

 

 

menu_bottom_background

::: copy right: 苗栗縣政府教育處資訊中心
建議使用瀏覽器Firefox或Chrome